2019 წლის 5 ივნისი ქ.თბილისის 142-ე საჯარო სკოლის მოსწავლეების,მასწავლებლებისა თუ სკოლის დირექციის მეხსიერებაში დაუვიწყარ, შთამბეჭდავ, ემოციებით სავსე, სულის ზეიმად დარჩება. დღე, რომელსაც ერქმევა სახელი“ქართლი-დედა წმინდანთა“.
იდეა,წმინდანთა თაყვანისცემისა, მათი მოწამეობრივი ღვაწლის დაფასებისა, მათი წმინდა სულების წინაშე ქედმოდრეკისა -ქართული ენისა და ლიტერატურის კათედრის მასწავლებლებში დაიბადა. იდეას მხარი აუბეს ამავე სკოლის ლიტერატურული სკოლის აქტიურმა მოსწავლეებმა,რომლებმაც მასწავლებლებთან თანამშრომლობით სიტყვა საქმედ აქციეს.
ქართლს,სრულიად საქართველოს გულში უამრავი წმინდანი ჩაუკრავს. ერთ ღონისძიებაზე ყველა წმინდანის ღვაწლის შესწავლა და სამზეოზე გამოტანის პრეტენზია არც გვქონდა. ეს ღონისძიება მცდელობა იყო ჩვენი, ქართველი ერის სულიერი პორტრეტის შესწავლისა, რომელიც აუცილებლად გაგრძელდება მომავალში და ყოველ სასწავლო წელს ვეთაყვანებით და სიყვარულით აღვნიშნავთ მათ ფასდაუდებელ ღვაწლსა და მადლს ღვთისა და ერის წინაშე.
რაც შეეხება ღონისძიებას, მთელი პასუხისმგებლობით მოეკიდნენ ქართული ენისა და ლიტერატურის მასწავლებლები:ლეილა ჟამიერაშვილი,რუსუდან კვერნაძე,ლილიანა გვიჩია,მაკა ფარეიშვილი,მარინა სარალიძე,ნაზიბროლა ვაჩეიშვილი, მაყვალა გერმანოზაშვილი,ლეილა საური. ეს პასუხისმგებლობა გადამდები აღმოჩნდა როგორც მონაწილე მოსწავლეებისათვის, აგრეთვე დამსწრე საზოგადოებისათვის.
ღონისძიება ხორციელი თვალის გასართობი და ხილვადი სასმენლის დამატკბობელი რომ არ იქნებოდა, თავიდანვე შეახსენა დამსწრე საზოგადოებას ქართული ენისა და ლიტერატურის კათედრის ხელმძღვანელმა,ქალბატონმა მაყვალა გერმანოზაშვილმა, რომ ასეთი თემატიკისათვის საჭირო იყო სულიერის თვალით მაყურებელი და გულისყურით მსმენელი.
მიუხედავად ხმის გამაძლიერებელი აპარატურის, მიკროფონების უქონლობისა,დარბაზში იყო იდეალური სმენადობა. მართლაც რომ, მაყურებელი მონატრებული იყო სულის საზრდოს რომლის მასპინძლობაც უშურველად და ღირსეულად შეძლეს სკოლის ლიტერატურული სალონის აქტიურმა წევრებმა.
სცენაზე რუსული სექტორის მოსწავლეებმა წარმოადგინეს წმინდა ნინოს ცხოვრებისა და მოღვაწეობის ამსახველი ეპიზოდები მხატვრულად, გამომეტყველებით, წმინდანისადმი მიძღვნილი ლექსებით. მასწავლებელი ქალბატონი ლეილა ჟამიერაშვილი.
წმინდა ნინოს მოჰყვა ქართლის დედოფლის წმინდა შუშანიკის მოწამეობრივი ღვაწლის ამსახველი სცენარი -მასწავლებელი ქალბატონი რუსუდან კვერნაძე.
სცენაზე ქალბატონ რუსუდანის მოსწავლეებს შეენაცვლნენ ქალბატონ ლილიანა გვიჩიას წმინდა აბოს ღვაწლის დამფასებელი მოსწავლეები, წმინდა აბოსთან სიყვარულით გაიხსენეს დიდი ნერსე ერისთავი, წმინდა აბოს სადიდებელი ძეგლის ავტორი ჰაგიოგრაფ-ჰიმნოგრაფი იოანე საბანისძე,სამოელ კათალიკოსი. ყოველივე მხატვრულად შეკრული სცენარით,სულითა და გულით წარმოთქმული სიტყვები მსმენელის გულსა და სულს მალამოდ ედებოდა. ეს ყველაფერი კი საგალობლების ფონზე იკითხებოდა, რაც ამაღლებულ განწყობას ქმნიდა დარბაზში.
მასწავლებელ მაკა ფარეიშვილის მოსწავლეებმა წაიკითხეს პოეტ კახა სულუაშვილის წმინდანებისადმი მიძღვნილი ლექსები, რომელშიც ნათელ სხივად ამობრწყინდა წმინდა ბერი თევდორეს სახე.
სცენაზე ქალბატონ მარინა სარალიძის მოსწავლეებმა გააცოცხლეს და ნათელი მოჰფინეს წმინდა დავით აღმაშენებლისა და ქეთევან წამებულის სახეებს.
ქართული ენისა და ლიტერატურის მასწავლებლის, ნაზიბროლა ვაჩეიშვილის მოსწავლეებმა წმინდა გაბრიელ ქიქოძის სახე გააცოცხლეს. მოსწავლეებს სიღრმისეულად ჰქონდათ გააზრებული წმინდანის ცხოვრება და მოღვაწეობა,რაც გამოიხატა საკუთარი ლექსების კითხვისას, რომელიც მიუძღვნეს წმინდა გაბრიელ ქიქოძეს.
სცენაზე გაისმა მოსწავლეთა გულებიდან წამოსული განგებისაგან მოვლენილი წმინდა და მართალი ილიას სიტყვები, მასწავლებელი მაყვალა გერმანოზაშვილი,VIII-V კლასის მოსწავლეები შემოქმედებითად მიუდგნენ დაკისრებულ მოვალეობას,რაც გამოიხატა მათ გარეგნულ იერსახეშიც. V კლასელებს თეთრ მაისურებზე ილიას პორტრეტი გამოესახათ. მხატვარი V კლასის უნიჭიერესი მოსწავლე ელენე ელყანიშვილი (დამრიგებელი ნანა მაჩიტიძე). ხოლო VIII კლასის მოსწავლეებს (დამრიგებელი ნაზი ბეჟანიშვილი) მაისურებზე სისხლის წვეთები დაეხატათ და ამით გვაგრძნობინებდნენ, რომ შინაგანად, სულით და გულით გათავისებული ჰქონდათ წმინდა და მართალი ილიას წიწამურის ტრაგედია. ამავე მოსწავლეებმა პატივი მიაგეს აფხაზეთის ომში ტრაგიკულად დაღუპულ ბერ ანდრია ყურაშვილს.
წმინდანთა ღვაწლის თხრობას ენაცვლებოდა ჩვენი სკოლის მომღერალ-მგალობელთა საგალობლები თუ სიმღერები. „წმინდაო ღმერთო“, „შენ ხარ ვენახი“,“ჩემო კარგო ქვეყანავ“ ხელმძღვანელი მუსიკის პედაგოგი, ქალბატონი იზა ტყეშელაშვილი.
შესანიშნავად წაიკითხეს ლექსები ქალბატონ ლელა საურის მოსწავლეებმა.
ღონისძიება პოეტ თინათინ მღვდელიაშვილის ლექსით და საგალობელით დასრულდა.
მიუხედავად სიცხისა და ღონისძიების ტევადობისა,მაყურებელი ბოლომდე გულისყურითა და მადლიერების გრძნობით ისმენდა.
დასასრულს სკოლის დირექტორმა ქალბატონმა შორენა ცნობილაძემ შეაფასა მასწავლებელთა და მოსწავლეთაა გაწეული შრომა. სასწავლო ნაწილის გამგეებმა ქალბატონმა ბელა ჩიტიამ და დონარა სულამანიძემ მადლობა გადაუხადეს მონაწილე მოსწავლეებს, მათ მშობლებსა და უსურვეს მომავალი წარმატებები.
დღე სასაწაული, დღე წმინდანთა სულის წინაშე თაყვანისცემისა და ქედმოდრეკის, უდიდესი სიყვარულის გამოხატვისა. დღე სულიერი ამაღლებისა, სულის ზეობისა, დღე ერთსულოვნებისა და მადლიერებისა დაუვიწყარი იქნება.
5 ივნისის ჩაიბეჭდება ჩვენს მოგონებათა სკივრში, როგორც„ქართლი-დედა წმინდანთა“.
...“ქართლად ფრიადი ქვეყანაი აღირაცხების“ საქართველოდ ითვლება მთელი ქვეყანა. ეს წარწერები ამშვენებდა დარბაზს.თავისი მხატვრული გაფორმებით, სასანთლეებზე ანთებული სანთლები ნათელ მოგონებებათ დარჩება ჩვენში.